Makati High San Antonio

Ito ang lungsod ng Makati sa mata ng Pilipino – progresibo, sibilisado at patuloy na umaagapay sa hamon ng makabagong panahon. Ito ang lungsod na itinatag at tinataguyod ng mga mamamayang may paninindigan sa pagtupad ng isang misyong nauukol sa kagalingan ng lahat. Ito ang lungsod ng bagong milenyo, dala ang mga natupad na pangarap ng kahapon, mga pagsubok ng kasalukuyan at minimithing pag-asa ng bukas.

Sa patuloy na paglipas ng panahon, may lilisan at may maiiwan, may maglalaho at may matatagpuan. Sana’y sa paglisan ng iba sa atin ay mag-iwan sila ng magagandang alaala at mabubuting halimbawa na nagsisilbing gabay sa ating mga mithiin at adhikaing nakalaan para sa lungsod na ito. Maitanim din sana sa ating kamalayan na ang Makati ay hindi lamang isang piraso ng lupain sa bahaging ito ng kamaynilaan kundi isang pamayanang binubuo ng mga mamayanang may kakayahang hubugin ang bukas nang naaayon sa makadiyos at makataong pamamaraan at hangarin.

Nasa inyong harapan ngayon ang isa sa mga milyun-milyong kabataang nananalangin, umaasa at nakikiisa sa layuning matupad ang lahat ng ating mga pangarap para sa lungsod na ito na siyang magsisilbing tanglaw sa ating tatahaking landas tungo sa pagkakaisa, kapayapaan at kaunlaran ng sambayanang Pilipino.